السّلام عليكم يا ناس اللمة الطيبين والغاليين
على ما أظن أني وليت مدمنة لهاد القسم " واش راك تهدر"
خاطر حنا الجزائريين نحبو نهدرو بزاف وكل يوم تقابلنا في مجتمعنا
حوايج تخليك ماش غير تهدر ، والحمد لله لي كاين زاوية في هاد اللمة
لي تخليك تهدر وتعبر ، المهم مانطولش عليكم وندخل في الموضوع مباشرة
علابالي راكم تخلعتو من العنوان وتقولو هادي باين غالبها رمضان
تبعوني نقولكم
هاد الأيام وبما أنو كل الصحافة والتلفزة تتكلم على داعش وآخر أعمال داعش
تفكرت واحد الحكاية اسمعوني نحكيهالكم
أنا عندي ختي اصغر مني تقرا في السنة ثانية ثانوي
وهاد العام كان عندهم نقص في أساتذة التربية الإسلامية
مالا جابولهم استاذ ملتحي وما شاء الله
زعما هاد الأستاذ يقري بضمير كيما باقي الأستاذ
هادا حسب ما سمعت من ختي
بصح يا خاوتي هاد الأستاذ بعد ما يخلص إلقاء الدرس
تاعو يستغل الوقت المتبقي ويقول للتلاميذ هاد الكلام
" يا تلاميذ، داعش خاوتنا وهوما لي راهم يدافعولنا على حقنا
راهم يحاربو ليل ونهار غير باه يحافظو علينا وينصرو الإسلام "
ينصرو الإسلام !!!!!
لما سمعت هاد الكلام من ختي تخلعت وخاصة أن هاد الكلام يعاودو
في كل قسم يقريه ، سبحان الله العظيم
أنا توسوست وزدت وسوست ختي معايا لدرجة أنها عادت خايفة وتقولي
" بالاك يزيد يفجر فينا قنبلة في نص المدرسة هههه "
ولاو يستغلو مادة نظيفة كمادة التربية الاسلامية لتخريب العقول
مزية أنو تلاميذ الثانوية كبار ويعرفو صلاحهم
اتخيلو لو هاد الأمر يتكرر مع تلاميذ التعليم الإبتدائي ؟
صدقوني رايحين يخربولهم عقلهم وهوما صغار
حسبنا الله ونعم الوكيل
والحمد لله أنو الأستاذ هادا راح
قرا عام وراح ، بلاك يزيد يخرب عقول ناس خلاف في مكان خلاف
يا خاوتي حاذروا على خاوتكم الصغار وفهمومهم مليح
قادر بضحكة يلعبولهم على عقولهم وخاصة لما تشوف استاذ
يقري مادة دينية لأنو قادر يجبدهم بزوج كلمات
وعيو ولادكم خاطر الدنيا راهي ماتعجبش
ان شاء الله ماكنتش تقيلة عليكم
وصح فطورك وما تحرمونيش من آرائكم القيمة
تحياتي للجميع
الرئيسية
موضوع: داعِش خاوتنا ويدافعُو على حقنا 
الثلاثاء 11 أغسطس 2015, 11:30
