معلومات العضو انور سوفت طالب متميز
البيانات الشخصية عدد المساهمات : 250 الجنس :  العمر : 35
معلومات الإتصال |  موضوع: احمد ربّي وبركاك بلا جهل  الثلاثاء 11 أغسطس 2015, 11:00|
| السّلام عليكم يا ناس اللّمة الغاليين
ان شاء الله راكم كامل لباس بصغيركم وكبيركم
المهم مانطولش عليكم وندخل في الموضوع مباشرة
ونظنّ أنّو حسب العنوان مفهوم الموضوع لي رايحة نهدر عليه
والموضوع هادا معروف قبل ما نجي نعرف بيه أنا
المهم حنا الجزائريين لما نتكلمو مع بعضانا في الهاتف ولا نتلاقاو برا
أول كلمة نبداو بيها هي " واش راك ؟؟" أو " واش أحوالك " 
زعما نسقسيو بيها على الأحوال , بصح لما نسقسيك أنا ونقولك
واش أحوالك ؟؟ قصدي نعرف حالتك على العموم ( يعني المهم ما لحقتش للكبيرة خلاص )
ماشي نسمع منك قصة حياتك  , درك العيب يا خاوتي
ماشي لما نسمعو شكوة بعضانا بالعكس رانا خاوا وعائلة وأصدقاء وكل واحد يسمع لخوه
لكن المشكة الحقيقية أنو المهموم ولي ضاقت بيه الدنيا راهو يقولك "الحمد لله" ويسكت
وكن ماشي بالسيف تخرج من عندو كلمة ما تسمعش همو ، لأنو علابالو واش معناتها كلمة
" الحمد لله " وقيمتها , لكن عكس ناس خلاف يا إما يبدالك كلامو "بوالله الحالة ماتعجب "  ويا إما "والله راني في حالة و ضو النهار ما نشوفش فيه "  والمزيد من المصطلحات الأخرى 
والمشكلة يزيد يحلف ؟؟ وهو البارح شرا سيارة آخر طراز
صدقوني تلقاهم صحة وهنا ومال وولاد وكل شي ويشكي ( واش يزيدك ربي ؟؟)
على الأقل أحمدو واسكت بالاك يهديك وتبركا شوي من هاد الشكوة
وإذا ما شكاش واش يقولك ؟
والله الحمد لله العايلة بخير والصحة بخير والأولاد بخير بصح الحالة ما تشكرش ؟؟
درك فهم روحك راك بخير ولا الحالة ماتشكرش؟؟
ولا بالاك حشمت تقول بلي راك بخير ؟؟ ولا خفت من العين ؟؟ 
من المفروض مهما واش يصرالك في هاد الدنيا تحمد ربي عليه لأنو كاين لي كتر منك
روح اضرب دورة على المستشفيات تشوف ناس مرمية حتى جلدهم لصق مع السرير, وكي تسقسيه يقولك " الحمد لله "
تشوف ولاد صغار من المفروض راهم يلعبو ويفرحو بشبابهم شعرهم راح بسبب مرض خطير
وكي تسقسيه يقولك "الحمد لله"
تشوف ناس ترقد والآلات الطبية لاصقة فيهم , لا عرفوا طعم الحياة ولا عرفوا بنة النوم والراحة ولما تسقسيه يقولك "الحمد لله "
تشوف زوجين حياتهم مظلمة , ليل ونهار من طبيب لطبيب وهوما محرومين من سماع كلمة بابا وماما ولما تسقسيهم يقولولك "الحمد لله "
زيد اضرب دورة لدار اليتامى تلقى ناس تحلم تشوف شخص تسميه بابا و يما
يشوفو في الناس كامل مع عايلتهم غير هوما وحدهم ولما تسقسيهم يقولولك "الحمد لله"
زيد شوف المقابر , لي تحرم من والديه , لي تحرم من عايلتو خطفهم حادث مرور, لي تحرم من ولادو بعد ما كانو شمعة الدار ولما تسقسيهم يقولولك"الحمد لله"
وكاين لي كتر وكتر
في هاد الدنيا قبل ما تشكي من حالتك اتفكر بلي كاين لي كتر منك
إذا عندك صحة, تعليم, أب وأم , عائلة , دار , لسان !!
هيه مادام عندك لسان قول "الحمد لله "
كاين لي راهو محروم من ربع النعم لي عندك , ما تنساوش الحمد لله حتى ولو كانت ناقصتك حاجة يزيد يرزقك ربي من عندو , حتى ولو حرمك ربي من كل شي اشكر على نعمة اللسان لي راهو يذكر ويشكر
جميع من واحد عندو مشكلة في حياتو ماتجهلش وقول الحمد لله
بالحمد تزيد النعم تاعك
تحياتي للجميع |
|
الرئيسية
